पृथ्वी राजमार्ग अवरुद्ध भएपछि कान्ति लोकपथमा सवारीसाधनको चाप बढ्यो

पृथ्वी राजमार्ग अवरुद्ध भएपछि काठमाडौँ उपत्यका प्रवेश गर्ने मालवाहक सवारीसाधनको चाप कान्ति लोकपथमा बढेको छ। हेटौँडाबाट आउने ट्रक र कन्टेनरहरू त्रिभुवन राजपथ हुँदै यो वैकल्पिक मार्ग प्रयोग गरिरहेका छन्। संकटको समयमा सारथिको रूपमा देखिएको यस सडकमा सवारीको चाप बढेसँगै ललितपुर क्षेत्रमा यातायात व्यवस्थापनमा चुनौती थपिएको छ।

काठमाडौँ उपत्यका प्रवेश गर्ने प्रमुख सडक पृथ्वी राजमार्ग अवरुद्ध भएपछि कान्ति लोकपथमा मालवाहक सवारीसाधनको चाप बढेको छ। हेटौँडाबाट आउने सवारीसाधनलाई त्रिभुवन राजपथ हुँदै काठमाडौँ पठाउने र काठमाडौँबाट खाली सवारीसाधनलाई कान्ति लोकपथ हुँदै हेटौँडा पठाउने व्यवस्था गरिएको छ। भदौ १४ गते धादिङको बेनीघाट रोराङ गाउँपालिका-७ स्थित कृष्णभीरमा त्रिशूली नदीको बहावका कारण सडक अवरुद्ध भएको हो।