मन्त्री विराज भक्त श्रेष्ठद्वारा भोटेकोशी बाढीका घाइतेहरूको स्वास्थ्य अवस्थाबारे जानकारी

ऊर्जा, जलस्रोत तथा सिँचाइ मन्त्री विराज भक्त श्रेष्ठले आइतबार छाउनीस्थित वीरेन्द्र सैनिक अस्पताल पुगेर रसुवाको भोटेकोशी नदीमा आएको बाढीमा परी घाइते भएका कर्मचारीहरूको स्वास्थ्य अवस्थाबारे जानकारी लिनुभएको छ। त्रिशूली थ्री 'ए' जलविद्युत् आयोजनाको सुरुङमार्गबाट उद्धार गरिएका ती कर्मचारी र उनीहरूका परिवारसँग भेट गर्दै मन्त्री श्रेष्ठले घाइतेहरूको उपचारको अवस्थाबारे चासो व्यक्त गर्नुभयो। सो अवसरमा मन्त्री श्रेष्ठले बाढीको चपेटामा परेका कर्मचारीहरूलाई शारीरिक उपचारका साथै मानसिक परामर्शको समेत आवश्यकता रहेको बताउनुभयो।