पक्राउ परेकालाई जथाभावी हतकडी नलगाउन सर्वोच्च अदालतको कारण देखाउ आदेश

पक्राउ परेका र हिरासतमा रहेका व्यक्तिहरूलाई जथाभावी हतकडी लगाउने प्रहरीको कार्यशैलीविरुद्ध परेको रिटमा सर्वोच्च अदालतले कारण देखाउ आदेश जारी गरेको छ। न्यायाधीश मेघराज पोखरेलको एकल इजलासले प्रधानमन्त्री तथा मन्त्रिपरिषद्को कार्यालय, गृह मन्त्रालय, प्रहरी प्रधान कार्यालय र प्रेस काउन्सिल नेपाललाई १५ दिनभित्र लिखित जवाफ पेस गर्न आदेश दिएको हो। कानुनका विद्यार्थीहरू रोशन आउजी, विकास यादव र विवेक चौधरीले दायर गरेको उक्त रिटमा हतकडीलाई अन्तिम विकल्पका रूपमा मात्र प्रयोग गर्न र हतकडी लगाइएका व्यक्तिको तस्बिर सार्वजनिक नगर्न माग गरिएको छ।