जोखिममा रहेका हिमतालको म्यापिङ र अनुगमन गर्न अभिनेता प्रदीप खड्काको आग्रह

नेपाली चलचित्रका लोकप्रिय अभिनेता प्रदीप खड्काले जलवायु परिवर्तनको जोखिम न्यूनीकरणका लागि जोखिममा रहेका हिमतालहरूको म्यापिङ र अनुगमन सुरु गर्नुपर्नेमा जोड दिएका छन्। कर्णाली अन्तर्राष्ट्रिय चलचित्र महोत्सवका 'जलवायु सद्भावना दूत' समेत रहेका खड्काले राष्ट्रिय तथा अन्तर्राष्ट्रिय मञ्चहरूमा नेपालका हिमाल र वातावरण संरक्षणको एजेन्डा उठाउँदै आएका छन्। हालै रसुवाको भोटेकोशी क्षेत्रको भ्रमणपछि उनले हिमाली क्षेत्रको सुरक्षाका लागि वैज्ञानिक अनुसन्धान र जलवायु न्यायको आवश्यकता औंल्याएका हुन्।