मार्कीचोक–भरतपुर २२० केभी प्रसारण लाइनको असार २३ देखि परीक्षण गरिँदै

नेपाल विद्युत् प्राधिकरणले मर्स्याङ्दी करिडोर २२० केभी प्रसारण लाइन अन्तर्गतको मार्कीचोक–भरतपुर खण्डमा आगामी असार २३ गतेदेखि विद्युत् प्रवाह गरी परीक्षण सुरु गर्ने भएको छ। प्राधिकरणले एक सार्वजनिक सूचना जारी गर्दै उक्त प्रसारण लाइनमा २२० किलोभोल्ट क्षमताको विद्युत् प्रवाह गरिने जानकारी दिएको छ। यो आयोजनाले तनहुँ र चितवन क्षेत्रको विद्युत् वितरण प्रणालीलाई थप सुदृढ बनाउने अपेक्षा गरिएको छ। परीक्षणका क्रममा प्रसारण लाइन आसपासका क्षेत्रमा सुरक्षा सतर्कता अपनाउन प्राधिकरणले स्थानीय बासिन्दालाई आग्रह गरेको छ।