शिक्षा मन्त्रालयको 'शिक्षा संवाद' कार्यक्रममा शिक्षक महासंघको आपत्ति

शिक्षा तथा खेलकुद मन्त्रालयले सातै प्रदेशमा आयोजना गरेको 'शिक्षा संवाद' कार्यक्रममा आफूहरूलाई सहभागी नगराएको भन्दै नेपाल शिक्षक महासंघले आपत्ति जनाएको छ। नयाँ शिक्षा ऐन निर्माणका लागि सुझाव संकलन गर्न सुरु गरिएको उक्त कार्यक्रममा आधिकारिक पेसागत संस्थालाई बेवास्ता गरिएको महासंघको ठहर छ। महासंघका अध्यक्ष लक्ष्मीकिशोर सुवेदीले संस्थागत प्रतिनिधित्व सुनिश्चित नगरिए आन्दोलनमा उत्रने चेतावनी दिनुभएको छ। यस्तै, नेपाल राष्ट्रिय शिक्षक संगठनले पनि शिक्षकका पेसागत समस्या र नीतिगत समाधानका लागि सरकारसँग संस्थागत सहभागिताको माग गरेको छ।