फ्रान्समा हिंसापछि शनिबारको प्रदर्शनमा सेना परिचालन गरिने

फ्रान्सभर भएका हिंसात्मक प्रदर्शन, तोडफोड र व्यापक लुटपाटबाट अर्बौँ युरोको भौतिक क्षति भएपछि फ्रान्सेली सरकारले हिंसामा संलग्न व्यक्तिहरूबाटै क्षतिपूर्ति असुल गर्ने कडा नीतिको घोषणा गरेको छ। प्रधानमन्त्री सेबास्टियन लेकोर्नुले दङ्गाबाट प्रभावित व्यवसायी र क्षेत्रको पुनःउत्थानका लागि विशेष कोष बनाइने र त्यसको सम्पूर्ण खर्च हिंसा फैलाउनेहरूबाटै असुल गरिने स्पष्ट पारेको बीबीसीले जनाएको छ। सोमबार आयोजित आपत्कालीन बैठकपछि बोल्दै उनले यस्तो बताएका हुन्। महँगी र खस्कँदो सार्वजनिक सेवाविरुद्ध शनिबार भएको प्रदर्शन हिंसात्मक बनेपछि सरकार र राष्ट्रपति इमानुएल म्याक्रोंमाथि दबाब बढेको छ।

फ्रान्स सरकारले अक्टोबर १७ मा पेरिस, मार्सेई, लियोनलगायत सहरमा भएको हिंसा र लुटपाट नियन्त्रण गर्न नसकेको स्वीकार गर्दै आगामी शनिबार हुने प्रदर्शनका लागि प्रहरीसँगै सेना परिचालन गर्ने भएको छ। प्रधानमन्त्री सेबास्टियन लेकोर्नुले मंगलबार आगामी शनिबार व्यापक सुरक्षा व्यवस्था गरिने र तत्काल प्राथमिकता सुव्यवस्था कायम गर्नु रहेको बताए। गृहमन्त्री लरेन नुनेजले विगतका घटनाबाट पाठ सिक्दै सुरक्षा रणनीति परिवर्तन गरिने जनाए। सरकारले हिंसामा संलग्न व्यक्तिहरूबाटै क्षतिपूर्ति असुल गर्ने नीति पनि घोषणा गरेको छ।