स्वास्थ्य बीमा बोर्डद्वारा अनावश्यक परीक्षण गर्ने संस्थालाई कडा निर्देशन

स्वास्थ्य बीमा कार्यक्रमलाई थप प्रभावकारी, पारदर्शी र बीमितमैत्री बनाउन स्वास्थ्य बीमा बोर्डले देशभरका सेवा प्रदायक स्वास्थ्य संस्थाहरूलाई पाँचबुँदे निर्देशन जारी गरेको छ। बीमितको रोग र स्वास्थ्य अवस्थासँग सम्बन्धित नभएका अनावश्यक परीक्षणको दाबी अस्वीकृत गर्ने र त्यस्ता संस्थासँगको सम्झौता रद्ध गर्न सक्ने चेतावनी बोर्डले दिएको छ। नियमित औषधि खाने बीमितलाई तीन-तीन महिनाको औषधि दिन पनि बोर्डले निर्देशन दिएको छ। स्वास्थ्य बीमा ऐन, २०७४ अनुसार सम्झौता गरी सेवा दिइरहेका संस्थालाई काठमाडौंबाट यो परिपत्र जारी गरिएको हो।