नारायणी नदीमा आमा–छोरा बेपत्ता, छोरीको उद्धार

नारायणगढ बजारस्थित पशुपति मन्दिरनजिकै नारायणी नदीमा खुट्टा धुने क्रममा बुधबार साँझ आमा र छोरा बगेर बेपत्ता भएका छन् । साँझ करिब ६ः४५ बजे नदीले उनीहरूलाई बगाएको थियो । घटनामा छोरीको भने उद्धार गरिएको छ भने बेपत्ता आमा–छोराको खोजी जारी छ ।

चितवनको भरतपुर महानगरपालिका–१ स्थित पशुपति मन्दिर पछाडि नारायणी नदीमा खुट्टा धुने क्रममा बुधबार साँझ आमा र छोरा नदीले बगाएर बेपत्ता भएका छन् । नदीमा डुबेकी ११ वर्षीया छोरीको भने बुधबार नै उद्धार गरिएको थियो । बेपत्ता आमा र छोराको खोजी बिहीबार पनि जारी रहे पनि अवस्था पत्ता लाग्न सकेको छैन । जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार खैरहनी नगरपालिका–१ घर भई हाल भरतपुर महानगरपालिका–१२ मुनालचोकमा बसोबास गर्ने परिवारका ती व्यक्ति बेपत्ता छन् ।