रसुवाका बाढीपीडितका लागि भृकुटीमण्डपका व्यापारीद्वारा १३ लाख ५१ हजार सहयोग

भृकुटीमण्डपस्थित खुला बजारका व्यापारीहरूको संस्था ‘काठमाडौं निम्न व्यापारी संघ’ले प्रधानमन्त्री दैवी प्रकोप उद्धार कोषमा १३ लाख ५१ हजार रुपैयाँ सहयोग गरेको छ। संघका अध्यक्ष लक्ष्मीप्रसाद ओलीसहितको टोलीले सोमबार समाज कल्याण परिषद्का सदस्य सचिव चक्रबहादुर बुढालाई उक्त रकमको चेक हस्तान्तरण गरेको हो। रसुवाको भोटेकोशीमा आएको बाढीबाट प्रभावित रसुवा, नुवाकोट र धादिङका नागरिकको राहतका लागि व्यापारीहरूबाट रकम संकलन गरी यो सहयोग उपलब्ध गराइएको हो। सरकारले बाढी प्रभावितको सहयोगका लागि गरेको आह्वान बमोजिम संघले यो कदम चालेको जनाएको छ।