वीरगन्जको नारायणी अस्पतालका चिकित्सकद्वारा सामूहिक राजीनामा, आकस्मिक सेवा ठप्प

वीरगन्जस्थित नारायणी अस्पतालका चिकित्सकहरूले गत शनिबार चिकित्सकमाथि भएको कुटपिट र अस्पताल तोडफोडको विरोधमा सामूहिक राजीनामा दिएका छन्। अस्पतालका ७० मध्ये करिब ४० जना चिकित्सकले मेडिकल सुपरिन्टेन्डेन्ट डा. चित्तरञ्जन साहसमक्ष राजीनामा बुझाइसकेका छन् भने अन्य चिकित्सकहरू पनि राजीनामा दिने तयारीमा छन्। यस आन्दोलनका कारण अस्पतालको आकस्मिक सेवा लगायतका सम्पूर्ण सेवाहरू ठप्प भएका छन्। चिकित्सक डा. उदयनारायण सिंहका अनुसार स्वास्थ्यकर्मीको सुरक्षाको माग गर्दै यो कदम चालिएको हो।