भारी वर्षा र बाढीको जोखिमका कारण झापामा उच्च सतर्कता अपनाउन आग्रह

जल तथा मौसम विज्ञान विभाग अन्तर्गतको बाढी पूर्वानुमान महाशाखाले पूर्वी र मध्य नेपालका विभिन्न जिल्लाहरूमा आकस्मिक बाढीको चेतावनी जारी गरेको छ। बिहीबार झापा, मोरङ र धनकुटा भएर बहने साना नदी तथा खोलाहरूमा जलस्तर बढ्न सक्ने र बाढी आउन सक्ने चेतावनी दिइएको छ। मनसुनी वर्षा जारी रहेकाले नदी तटीय क्षेत्रका बासिन्दालाई उच्च सतर्कता अपनाउन आग्रह गरिएको छ।

जल तथा मौसम विज्ञान विभागले असार १६ र १७ गते देशका विभिन्न भागमा भारी वर्षा हुने प्रक्षेपण गरेपछि जिल्ला प्रशासन कार्यालय झापाले उच्च सतर्कता अपनाउन आग्रह गरेको छ। मनसुन सक्रिय भएसँगै पूर्वी तराई र पहाडी क्षेत्रमा बाढी, डुबान र पहिरोको जोखिम बढेको भन्दै प्रशासनले सचेत रहन सूचना जारी गरेको हो। यस्तै, इपिडिमियोलोजी तथा रोग नियन्त्रण महाशाखाले मनसुनसँगै देशभर सरुवा रोगको प्रकोप समेत बढ्दै गएको र हालसम्म १,६०० भन्दा बढी बिरामी फेला परेको जनाएको छ।