अष्ट्रेलियाली उच्च प्रतिनिधिमण्डलको नेपाल भ्रमण सम्पन्न, द्विपक्षीय सहकार्यमा जोड

दक्षिण तथा मध्य एसिया महाशाखाकी प्रथम सहायक सचिव सेरा स्टोरीको नेतृत्वमा आएको अष्ट्रेलियाली सरकारी प्रतिनिधिमण्डलले नेपालको तीनदिने भ्रमण सम्पन्न गरेको छ। भ्रमणका क्रममा दुई देशबीचको व्यापार, लगानी, शिक्षा र दिगो विकासका क्षेत्रमा द्विपक्षीय सहकार्य सुदृढ बनाउने विषयमा छलफल भएको छ। टोलीले जलवायु परिवर्तनका चुनौतीहरू र आपसी हितका विविध पक्षमा नेपाली अधिकारीहरूसँग विचार विमर्श गरेको थियो। यस भ्रमणले नेपाल र अष्ट्रेलियाबीचको कुटनीतिक सम्बन्धलाई थप बलियो बनाउने विश्वास गरिएको छ।